網民熱議：究竟淘大德福好唔好？雖然好住，但宜租不宜買？！
如果想喺市區買樓上車，資金又唔算好充裕嘅話，約有40年樓齡嘅九龍灣老牌屋苑德福花園同淘大花園，一直都係熱門選擇。有網民就喺連登討論區發帖，問：「究竟淘大德福好唔好？」，結果除咗引嚟網民熱烈討論呢兩個屋苑，仲將話題帶到討論「九龍灣三寶」，有意思想買呢區二手樓嘅話，都真係學到好多嘢呀！
德福最低層，唔記得帶鎖匙，都可以爬得返入屋！
對於淘大花園同德福花園，樓主嘅意見係：「樓底好低，又舊，除咗可以準時返工之外，有咩優點？」，撐淘大德福嘅網民都提出淘大同德福超方便：「樓下有donki、taste、大生、阿布泰，已經好過好多人，唔洗跨村甚至跨區買餸同埋日用品，附近有補習社、戲院，唔同類型嘅食肆」、「4間戲院好屈，德福淘大mcl、emax、megabox」，「淘大除咗樓齡高，真係冇得彈！樓下應有盡有，附近德福商場、 donki、運動場、泳池、又近mtr，觀塘道又大量巴士線，返工方便，出外返屋企又方便」、「住果度觀塘返工番到屋企，再望番觀塘道，會覺得人生容易咗！」
風趣嘅網民仲提出咗「另類」嘅「優點」撐呢兩個屋苑：「德福最低層，真係唔記得帶鎖匙，都可以爬得返入屋」、「好方便，買嘢睇戲買餸搭車都近，只係舊同多凶宅」、「唔怕兇宅，唔怕風水唔好，冇嘢輸嫁！市區諗唔到第二到（度）比呢到（度）好，你話深水埗 太子，日日成班道友係到（喺度），真係你住埋我嗰份」、「窮鬼惡d」。
網民覺得淘大花園商場有DONKI及阿布泰等店，買日用品及食物超方便。
亦有鍾意睇戲網民，認為呢個區有4間戲院之多，到達屈機地步。
如果喺觀塘返工而住喺呢兩個屋苑，網民直頭覺得人生容易咗！
網民話如果住德福花園最低層，唔記得帶鎖匙，都可以爬得返入屋……究竟係彈定讚？
德福個個星期漏煤氣，如果要整，每戶都要嘔廿幾萬？！
網民普遍認為德福花園太殘舊，問題比淘大花園大：「上年行經德福見平台拉哂橫額控訴，唔知係咪同維修保養有關」，網民回應：「好似話同mtr有業權 單邊攪唔到維修」、「呢（而）家應該傾好？我見有幾棟已經圍晒網」、「垃圾到喊，千奇唔好買，所有喉管、牆身、防水都有問題，個個星期漏煤氣，水喉又漏，如果要整，成個屋苑每戶都要嘔廿幾萬」、德福衰x過淘大，個個星期都因為漏煤氣要叫消防」。
仲有地鐵廠嘅噪音問題：「德福有啲單位對住鐵路，嘈x死你，夜晚都拖車入去整。仲有，德福個大堂同走廊衰過公屋，去睇吓就知。不過，平……」有網民都溫馨提示：「睇樓記得感受樓下車聲」。網民普遍都認為淘大花園比德福好：「上車盤黎講淘大無得輸啦，衣食住行都極方便，如果要求會所泳池就去睇一手樓啦！德福內籠上過去就知殘，同埋頂樓無電梯到」。
大量網民話德福花園保養差，喉管同煤氣喉等都經常要維修。
德福花園下面就係港鐵九龍灣車廠，好多網民都話有噪音問題。
九龍灣三寶 宜租不宜買？！
網民普遍對淘大花園評價較高，仲詳細分析有乜嘢優同缺點：「淘大優點：樓下有n間餐廳、戲院、24小時金拱門、商場同附近舖頭幾乎乜都有得買，行去更多平野買既安基苑商場同牛頭角街市都係幾分鐘、算近地鐵（但都要行5-8分鐘，大熱天時上天橋樓梯都咪話唔辛苦）、交通工具多樣，全港>95%地方都去到。缺點：樓齡高，搵下一手接唔容易（除非銀行同按保再放寬限制）、廢老多、廢氣多、中低層向牛頭角道既單位會嘈到pk，污糟（但3-40年樓齡、樓下仲有食肆既屋苑黎講都算係咁，唔算太差）、樓同樓之間距離極近、樓底低、無會所。講真，500-700萬預算上車，$12,000-15,000租，九龍灣三寶都算係咁，市區黎講可能淨係得深水埗長沙灣嗰堆半新單幢有得比下」。
有網民提議可以考慮埋旁邊嘅得寶花園：「得寶好似到而家都未做過大維修……入去睇樓 睇完一次已經foul左佢！不過有個佢有淘大無 、見仁見智嘅點，就係畀養狗！第一城河畔嗰啲都ok，靜過九龍灣牛頭角好多，但有得揀我個人都係傾向九龍，始終去旺角觀塘深水埗都快啲平啲，三寶啲單位都唔係話個個嘈，向山向內園向公園既單位都好靜。仲有就係：淘大有樣野好嘅，係有好多唔同款呎數嘅單位 ，由2百頭到4百尾都有，則就普普通通咁啦！」
不過亦有網民作出呢個總結：「自住一流，租得過！但樓齡大，下一手好難接，唔值得買」。
九龍灣三寶之一嘅得寶花園，網民提出佢嘅優點，係可以養狗。
網友話淘大花園另一好處，係有多款唔同呎數嘅單位供選擇。
有網友總結認為，九龍灣三寶好住，但始終樓齡高，宜租不宜買。
text/Joyce
photo/HKET圖片庫
============
同場加映：
【蝸居睇樓團】上門睇風水！龍師傅解答風水屋謬誤 背山望海唔一定好、大門對窗唔一定漏財？
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
