家長伸手入夾公仔機疑「偷公仔」被揭發辯稱：攞出嚟睇一睇
夾公仔機盛行固然多人幫襯，但不時都會出現令人難以置信的情境。近日網上流傳一組影片，顯示一名婦人在某間遊戲機中心，直接伸手入夾公仔機底部，企圖扯出公仔，豈料被同場玩家發現即時制止，惟對方被揭發後更辯稱「都就嚟執囉，你唔攞都係去堆填區架喎」，後來又改口指「攞出嚟睇一睇」，拍片目擊者直言「你依家係偷緊嘢」及後將事件告知予職員，並交由店方處理。
家長疑偷公仔？伸手入夾公仔機被揭發稱：攞出嚟睇一睇
上個周日（30日）有市民透過Threads上發布多段影片，指當日前往冒險樂園玩，發現一名女士攜同小朋友，踎在地上公然伸手入夾公仔機底部，打算扯出公仔，惟現場被樓主揭發，並即時拍下「罪證」欲制止有關行為，對方第一反應竟然繼續理直氣壯，直言「都就嚟執囉，你唔攞都係去堆填區架喎」，行為令人髮指。樓主不禁批評：「身教嘅重要性...真心覺得唔識教唔好生」。
樓主表示：「其實呢位姐姐踎喺度整咗好耐，但係我哋喺隔離玩嘅時候冇留意，跟住再望一望發現佢原來喺度扯緊個公仔出嚟」。
她續指：「我估唔到今時今日仲可以咁明目張膽…然後問佢喺度做緊乜嘅時候……佢就話攞公仔跟住話『如果唔攞嘅話啲公仔都係去堆填區』。」
影片開首見到，樓主與友人上前詢問該女子「你攞緊咩啊」，對方稱「公仔囉」！樓主友人再指：「你都無夾中」，女子回應稱「佢話免費㗎喎，網上講有十次機會㗎嘛。」據指，女子所指的「十次機會」，是指該銅鑼灣分店因結業（3月30日）推出送50個代幣，予會員免費玩夾公仔的活動。
女子被制止後理直氣壯：你唔攞都係去堆填區架喎
樓主續表示：「唔係咁樣自己掹喎。」對方竟然回應：「但係都就嚟執囉，你唔攞都係去堆填區架喎」樓主立即批評道：「咁唔等於你可以咁樣攞，你呢個行為係偷喎」，女子隨即才站起來，樓主與其友人則將事件告知職員，該女子續指「一係報警囉！」及後又大聲辯稱：「個問題係我無攞走喎，你唔畀我攞係到睇一睇，跟住擺返好架咩？」樓主則表示，自己僅指出對方行為不當的問題，是否報警會交由店方決定。
網民批評：咁嘅阿媽教壞晒啲仔女
影片惹來網民留言批評：「公仔一個，何必以身犯險？教壞咗個女第日偷嘢，今次無事，下次啲人揸正做個女就留案底了，為乜呢？」「咁嘅阿媽教壞晒啲仔女 ，我係你銀包拎左你啲信用卡同錢，但我都未用，咁樣就唔犯法？」有網民表示：「帶住啲仔女都做啲偷嘢行為，仲大條道理覺得自己啱，生仔要考牌」、「一日佢未出門口你都唔可以話佢係偷，報警都無用」、「反而我想知道，點解下面度門咁易打得開，可以攞到？」樓主及後在留言表示，最後職員與該女子進行溝通，並指出有關行為的不當之處，最終沒有報警處理。
▼原帖文▼
資料及圖片來源：Facebook@香港交通及突發事故報料區、Threads
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
